Глава 61
О роженицы, еже в дому с християны прилучится бытии
И егда случится роженицы в дому том бытии идеже християнин живет, то подобает тому християнину 1000 поклонов сотворити до земли по законоположению древних отец, общаго отеческаго и братскаго соборнаго суда, того ради лишены иерейскаго общения. И сего общаго соборнаго суда отеческаго да держимся, очищения ради от скверны, да неуподобимся поганым языком, иже в скверности и нечистоте пребывающие. Но аще будет Господу Богу угодно или ни, но точию отеческое разсуждение и благословение исполним. Тако бо нас Писание научает (Апостол зачало 333) повиноватися и покарятися наставником и без их совета ничто же творити. Писание указует понеже подобает и отеческое разсуждение неменьше писанаго законоположения держати. Того ради не на сладость или прелесть поучение сих бывает. Аще и без Писания предающее, но и от обычая древних отец и во обычаях описует.
Матфеи Иерусалимскии сице глаголет: «О них же не Писание лежит, закон сохраняти подобает». Навычение обычаи, тем же долгим обычаем искушенное и на многа лета сохранение, не меньше Писаннаго Закона держати обыкоша. А паче же просим и молим всех хотящих спастися, из домов таковых бежати, яко змия люта или огня жгущаго. И пребывати в чистоте сохранно с рабами Божиими во единои храмине. Сего ради нас Писание во укрепление приводит, яко верни Владыку познаша своего, и что сие житие нечисто есть, и большее сих ради приемлет вечное мучение паче неверных. О горе и воистинну горе всякому християнину пребывающему в таковом скверном и нечистом жительствовании.
Глава 62
Еже не подобает без святаго образа в дороги ездити
А в дорогах ездящим християном не подобает без святаго образа бытии, ни ходити ни ездити. Понеже в домех мирских християнских образов не имущих, своя им образом новоизданныя. Тех им образом молитися неподобает, но весма себе опасно соблюдати от них и образ свои в храмину их вшедше поставити и помолитися и честь воздати домашним.
Такоже аще и прилучится нужды ради нечто купити, и то купленное брашно поставити пред святым образом и вервицу помолитися по завещанию Святаго Писания и по разсуждению отеческому и никакоже презирати сего твердаго и крепкаго законоположения. А о святых образех верное известное свидетельство зде предлагая от Святаго Писания. Понеже и прежде сего времени в самое то не нужное время, но во благочестивое и Богоприятное время, святии отцы иконы святые ношаху. Яко же о том повествует Святое Писание, сице глаголющее: (Зиновий от Ниловой пустыни лист 139 и Григорий Богослов лист 60) «и прежде убо нас святии ношаху иконы, егда прихождаху в соборы и никтоже от христолюбец благочестив сыи пут шествуя без иконы хождаху яко угодницы добри Богу. Сице и нам подобает ревновати святым и иконы святыя с собою носити. Сего ради и мы советуем всем православным християном без святаго образа не куда не ходити и не боятися еретик не стыдитися и не поклонятися их образом никакоже, но аще и страшно есть, но надежду подобает имети на Господа Бога и во всем уповати на Него.
Глава 63
О сем яко неподобает не помолившуся Богу святых книг прочитати
Подобает и сие незабвенно хранити и блюсти опасно повелеваемое святыми, и не полагати бы сие яко в некое небрежение сию святую вещь душеспасительную еже есть Слово Божие тако просто прочитывати, но прежде восстав помолитися и молитву сию уставленную святыми глаголати: (Альфа и Омега) «Господи Исусе Христе, отверзи ми уши и очи сердца моего, еже слышати ми слово Твое и разумети е, и творити волю Твою, яко пришлец аз есмь на земли. Господи не скрыи от мене заповедеи Твоих, но открыи очи мои и увем чюдеса Твоя от Закона Твоего, но просвети ми Господи ум разумети заповеди Твоя сказати ми безвестная и таиная Премудрости Твоея, на Тя бо уповаю Боже мои, яко Ты просветивши ми ум и мысль светом разума Твоего, не токмо чести написанных, но и творити, да не в грех себе святых жития и словеса почитаю, но во обновление и просвещение и святыню и в покров души моеи ив провождение к жизни вечнои яко Ты просвещение наше и о Тебе есть всяко даяние благо и всяк дар совершен и Тебе славу возсылаем Отцу и Сыну и Святому Духу, ныне и присно и во веки веком, Аминь».
Сему же подобно и Божественный Златоуст поучает глаголя: «Егда начнеши чести всяку книгу и сию молитву глаголати, прежде чтения, а егда же чтеши с прилежанием и болезнию чти, во мнози устроении, не мимо ходя стихи и нетщися токмо листов миновати. Но аще есть потреба не ленися, но дважды и трижды и множицею стих проиди яко да разумееши силу его. Егда же хощещи почести или чтущаго послушати прежде помолися Богу, глаголя молитву предреченную. Сице убо многое и безчисленное Святое Писание о молитве сеи сказует и преподобный Ефрем и Прологи и Патерики и Святоотечники и священноинок Дорофеи вси согласно о сеи молитве глаголют, всегда творити ко всякому чтению Святаго Писания и молитву уставленную святыми и досточудными мужи глаголати. Даже бы доброразсудительно и разумно было и своему разуму и смыслу не погрешительно како или что разсуждати от Святаго и Божественнаго Писания, не своему мнению и несоветному разуму никакоже последовати. Такоже и о слушащих и приседящих Слову Божию и хотящих слушати словеса душеспасительная простити и молитися о них подобает даже бы внятно и разумно было всем послушающим, а о молитве предписанней пред чтением глаголати, никто же да усумнится, несть бо наш разум и составление. Но многое множество о сем Святое Писание не повелевает. Нам же подобает паче всего, Господних Словес слушати и внимати еже глаголет: «Просите и дастся Вам» и паки «Вся елика аще рече с верою просите и будет вам».
Тако же и слушающим наказует глаголя: «Блажени слышащии Слово Божие и хранящии я» и «Имеяи уши слышати да слышит». Аще ли же невнятно Слово приходит слышащим, то подобает паки вопросити чтущих и просити у Господа Бога по Исаии пророку «Приложи ми ухо слышати да слышит». Тако же и о Писании: «Аще кто и от себе пишет, сиречь от своего разума, но согласно со святовосточною церковию и святоотеческим законом и с священными правилы согласно слушати и внимати подобает. Понеже и святии многая и безчисленная Святая Писания от себе произведоша и от благодати Духа Святаго научени быша, по согласию православныя християнския веры Церковь Божия вся та с любовию и с похвалою пряла есть.
Но сия вся творити с прошением и молением от Владыки Христа Бога и со благословением отеческим и с любовным братским советом. И тако Божия благодать начало и конец будет нам. А пред молитвою полагати 3 поклона до пояса и по молитве тако же 3 поклона полагати. И тако благословитися от отца или брата и начатии чести со умилением.
Глава 64
О сем яко всякому чтущему Словеса Божественнаго Писания, подобает прежде молитву сотворити, ея же святии вси узаконоположиша
Ведомо же буди и о сем, яко не подобает тако просто Словеса поучительная Святаго Писания без молитвы читати. Того ради да бы Господь Бог даровал разум чтущему Спасительное Слово и разсуждение право. В святоотечестем законоположении и во всем Святом и Божественном Писании возимети, молитвы ради законом повеленныя от святых и богоносных отец. Даже бы было душеспасительно всем чтущим и слышащим и внятно и разумно Слово Божие в сердцы полагати и слезы умиленныя источати и делом чтомое совершати, яко же рече Святое Евангелие: «Блажени слышащии Слово Божие и хранящии о сем бо научают нас многое множество святых сиречь Патерики и Прологи и прочия многия Святоотечники и преподобный Ефрем и священноинок Дорофей.
Яко же о сем ныне предложим ведение от всех святых отец, во всем сим согласныя иже предаша нам и научиша нас тако творити. И тако Словеса Божия прочитовати, яко же глаголет «Альфа и Омега», сиречь «Начало и Конец» в предисловии книги своея, приводя во свидетельство святаго Иоанна Златоустаго сице глаголя: «Егда начнеши чисти всяку книгу и сия молитва глаголати прежде чтения, а егда чтеши с прилежанием и болезнию чти во мнозе устроении не мимо ходя стихи и нетщися токмо листов миновати, но аще есть потреба не ленися, но дважды и трижды и множицею стих проиди, яко да разумееши силу его». И егда хощеши почести или чтущаго послушати прежде помолитися Богу (Сиречь 3 поклона до пояса) и глаголи сице: «Господи Исусе Христе, отверзи ми уши и очи сердца моего» (писано на листе 256, книги сия). И о сем весьма просим всех о Христе братию и молим да сия вся будем и сотворим без лености повеленная святыми.
Глава 65
О сем яко не подобает чтущему Святое Писание и учащему ничесоже за труд от слышащих восприимати
Еще же и о сем совет благ и душеспасительный предлагаем, всем купно о Христе отцем и братиям поучающим и чтущим Святое и Божественное Писание да никтоже, что мало или велико восхощут за труд свои восприятии, от послушающих словес Святаго и Божественнаго Писания. Да не сотворити сие еже продати Слово Божие на цене. Понеже вси святии никтоже коснуся слово поучительное продати, но вси (убо) с радостию духовною и с любовию еже о Христе поучаху. Не сие бо глаголю еже книги продаяти, сие бо исперва предание сотворися издревле убо во Святом Писании находится много в житиях святых, еже писаху и продаяху книг и тем приобретаху пищу себе.
А поучение духовное тако просто предаяху и обращаху неверныя к вере Христове и от тьмы заблуждения привождаху ко свету истиннаго познания. А за учение не коснушася святии ни мало что прияти за труд учения, поминающее Господне Слово реченное: «Яко туне приясте дар от Бога, туне и дадите». И паки: «Не носити влагалища, ни припояси мед». Подобно и Святое Благовествование (Иоанн зач. 7), сим же подобно и согласно сказует. И от приятия за труд учительныи возбраняет и пенязю коснутися. Сице бо глаголет: «Но аще кто и пенязь слов реку учения, продает учитель сыи, и не возвещает слова аще не преобретение имать и таковаго седалища опрометает Господь». Престол глаголю учения и слово наказания, еже он зле содержит и злобы ради не подает всем. Господь же Исус Христос разсыплет человеколюбия ради и людем раздает, того убо власть разорит и иного достоина на учительстем столе посажает.
Сице убо глаголет Святое Благовестие, блюдем же и мы опасно, еже что взимати за учение, но прими яко милостыню и да помолишися зань или инеем да отдаси или свещу поставиши или образ святыи да напишиши или книгу купити да имеши или ино что от святых. А на плотьскую утварь да никакоже что возмеши ни единаго пенязя, но аще и труд велии приложил еси ко учению, но мзда тебе премнога воздастся от Господа на небесех, но точию потщися потрудитися о Словеси Божии или верна или неверна наставляя к свету разума. Оваго на покаяние, оваго же ко свету благочестия. Тако и Писание Святое Господне о сих глаголет: «Изводяи бо честное от недостойнаго, яко уста моя будут». Но аще видиши брата согрешающа не премолчи, но обличи и настави его на путь покаяния, яко же глаголет святыи Максим Исповедник, слово 11: «Аще не обличу грешника, то часть прииму со прелюбодеем». Аще не обличати и не наказовати есть известная пагуба, лучше и добрее есть языку моему отрезану бытии нежели молчати и не помагати истинней вере. Велегласно всех уча и наказуя блогочестивыя веры держати, но аще такоже и ересью кого видиши некою повреждена тако же не премолчи, тако бо глаголют о сем священная правила (6 собора). Не подобает молчанием ереси покрывати. Молчаливый бо потаковник иже молчит и не обличает грехи брата своего не милосерд есть. И подобен оставившим яд в теле уяденнаго от ядовитаго зверя.
Да аще о гресе подобает обличати, кольми паче не молчати, да не умаляется человеком спасение. Ибо всяк человек освящается веры исповеданием, но Златоуст Божественный глаголет: (Маргарит Слово 12) «Ты же веси таковыя творящих и тщишися утаити и не обличаеши сам ниже исповеси иным могущим сия упразднити, не явственно ли есть, яко и ты любиши. Тем же и со онеми иже сия вторящими огню вечному предан будеши (Нил Сорский Слово 65).
Сице все Божественное Писание поведает древни бо отцы мнози делателие и учителие нам бывшее един другаго назидаху и укрепляху, ныне же оскудевшим таковым. Аще ли же кто в нынешнее время последнее потщися в дело Божие, тому уже и паче благодать Божия вразумляет и помогает, тако речено есть первыми святыми, иже кто в нынешнее время спасется, тои большую мзду приемлет, паче древних святых. Сего ради молю братскую поучительную любовь еже поучати и вразумляти всех купно желающих разума истиннаго и спасительнаго получити. Да не приемлет же ни мало что за труд свои, сиречь за учение, но да приемлеши за сие велие воздаяние от Царя Славы со всеми святыми во Царствии Небеснем, во веки. Аминь.
Глава 66
О сем яко не подобает староветхия иконы в воду вметати
Ибо и святыя иконы зело состарившияся и лиц ничто же имущия не подобает их поверзати в воду, сиречь в реку ибо житие наше посреде нечестивых имеется. И тыя вверженыя образы ветхия и лиц не имущия, приимают мирстии человецы аки на своя иконная воображения, инии же емлют их на некое телесное рукодельство, дети же имают на игры, а жены тако же поемлют сих дщиц на покровение сосудов чистых и поганых. А вся у них несть чисто ничтоже, но вся скверна нечиста.
Тако же и углие кадильное недостоит в реку вметати, понеже углие негниющее скоро испометаемаго вретища изгнивающаго исплавляют. К сему же и о сем достоит разумети, яко мытие скверное на реках измывают и плавание безчинное сотворяют и блудныя дела содевают и ногами нечистыми в воде и на брегах ходят и дети таковии же на водах играют и смрад из себе испущают и углие оное кадильное под ногами у них обретается и сие повредительно есть святыне оной.
Да сего ради лучше есть паче сего в пещь влагати и сожигати. Подобно пишет Афанасий Александрийский лист 37 «О святых иконах ветхих и лиц не имеющих сожигати повелевает». Сице бо тако глаголет и к вопросу ответ сотворяет, не яко богом и иконном покланяемся верни, да не будет, яко же елини. Но токмо желание и любовь нашея души к начертанию лица иконы являющее. Тем множицею начертанию стершуся ко древо просто иже некогда икону сжигаем. Да сего ради писаннаго и мы тако советуем творити и аще сомнительно есть о сем еже сожигати ино в сокровенное место влагати и никакую же потребу сих не употребляти, но опасно соблюдати. А сие мы не от себе предлагаем подобно яко же и устав о священнеи воде сказует сице глаголя: «Аще излиется некако священная вода на кое любо место, то изжигати то место повелевает. Тако же и о святых книгах зело ветхих и развалившихся и чисти по них несть мощно, и не употребляти их на некое дело или пометати и потирати или пометати на землю, но подобает их свившее и связавшее крепко положити в сокровенное место под верхом храмины и сия вся опасно сохраняти подобает. Тако убо повелевают и священная правила сия опасно соблюдати.
Глава 67
О верных иже брак прияша от еретик
С новоженцами которыя оба лица християнская и брак пряли от нынешнея церкве. Таковых весма от церкви отлучати и жит с ними родителем и всем верным не попускати. Аще ли, которыя родители или инии верни не хотят слушати и с ними восхощут житии и таковых такоже от церкви отлучати и общения с ними не имети, дондеже разлучатся и покаются и таковых паки приимати в братию.
Ибо таковии новоженцы отлучили себе от Господа Бога и святыя Божия Церкве и от православныя християнския веры. Того ради яко от благочестивыя веры отсупиша и ко еретичестеи церкви приступиша, и от сея беззаконныя церкве закон прияша и законным делом беззаконныи тои брак почтоша и яко законни муж и законная жена от закона не имущия церкве нарицаются и аще сия нынешняя церковь Бога истинна в себе имат и таинства вся духовная совершаются и тако может сия церковь и вся таины духовныя подати от первыя даже до последния то почто мы всуе труждаемся и от нея отбегаем и таины ея не единыя не приемлем.
Аще убо по сказанию Святаго Писания не разсуждаем ниже разсмотряем, то како можем спастися? Аще ли еретическое крещение (глаголют святии) несть Крещение, то како и Таина браковенчания быти может без осквернения аще убо крещения несть по реченному, то веемы яко и брака несть, понеже брак без Божия благословения не бывает и содеятися не может, яко же глаголет Писание (Катихизис Большои Глава 66). «Вопрос: Что есть брак? Ответ: брак есть Таина по благословению Божию во общее и нераздельное сожитие сопрягаются и паки глаголет: «Сопряжение мужа и жены по законному чину во сожитие нераздельное иже от Бога приемлют особне сию благодать». И паки: «Яко без благословения Божия тако и без церкве Божия не может совершитися брак яко же глаголет и Писание (Кормчая лист 558). Да накажут иереи обручившихся да прежде венчания и благословения церковнаго во едином дому да не пребывают, ниже телеснее совокупляются венчание же и брачное совокупление и благословление ни от кого прияти им достоит, точию от самаго своего приходскаго священника, повеление от него имущаго аще единаго есть прихода венчанию и благословению супружества в церкви достоит совершатися пред людми.
Ныне же сии еретически брак кто может нарещи брак, но паче скверность вменити подобает аще бо и православная церковь браком сочетает мужа православна и жену еретическу и таковыи брак и женитву не ключиму вменяет и законопреступен брак аще таковии восхотят покаятися да не пребудет брак к сему же и многая священная правила вопиют согласно Номоканон правило 51, Кормчая 6 собор, правило 72 и Соборник 4 глава, правило 52, Матфеи глава 12, Зинарь глава 72, 88. И сицевых ради страшных наказаний и запрещений не может сего прияти брака и почести браком без разделения сих не приемлем никакоже, но аще и разыдутся и разлучатся между собою житие, то таковых на покаяние приимати и сообщением сердечным пред Богом. И таковых правильно исправляти и к християном в место сочитати.
Аще ли не восхотят тако сотворити то подобает весма себе хранити от смешения с ними и соблюдати опасно, яко же преди речено и ныне паки глаголю по Святому Писанию и аще не послушает да будете весма отлучен и разделен понеже не восхоте послушати. Яко же глаголет Василий Великий (Лист 253): «Да будет от тебе отвержен и да возвестится о нем везде, не прияту ему бытии на всяко общение житеиския потребы». Яко да того ради понеже не смешатися ему с нами и будет Дияволу в снедь, аще смешение сотворим.
Глава 68
О имущих торговлю и меры не праведныя
Християном неким торговлю каковую любо имущим малу или велику неправду не подобает деяти, но праведныи суд имети, и паче же подобает весьма блюстися зело и хранитися весу неправеднаго или меры неправыя. Еже есть в велики вес приемлет, а в меньшии отдает или в меру великую приемлет, а в меньшую отдает, или кто купует каково любо жито ценою дешевою, а сам то жито долго не продает, а ожидает цены высокия и другия. И се сеи человек иже сия творяи отлучен будет от Бога, в день страшнаго Его Суда, проклят будет праведным судиею и послан вечно мучитися во огнь не угасимыи.
Сие убо страшное слово не туне глаголем, но согласно со Святым Писанием. Тако бо о сих сказует Писание Святое (Номоканон «О мерех»). «Последует миролюбцем обычаи и сребролюбцем скупо ценити пшеницу и воду размешивати в вино, да погибельно соберет богатство». Мы же убо Ветхаго и Новаго Писания соглядавше завещаваем всякому благочестно жити и хотящему спастися, внимати себе опасно о сицевом безместии. Аще бо имущее меры сугубыя великую и малую же продает, повелеваем же отврещися таковых от среды християн и проклятии по рекшему: «Скупо ценяи пшеницу от народа да проклят».
Аще же престанут сицеваго недуга и покаются да запретятся 4 лета сухоядением и с поклоны. Тако же и на лихву дающии сребро свое понеже бо богатым сребро дает Бог нищих ради. Сего ради лишающии сих и не дающии нищим яко убийцы осудятся. Подобает же и милостыню творити не от таковаго имения яко же преди рекохом, но от праведнаго собрания даяти. Аще ли кто от преждереченнаго неправеднаго и скупоцененнаго и от весу умаленнаго имения дает нищим или странных покоит, таковыи человек паче прогневает Бога. Понеже не от праведнаго имения Бог не хощет даяти милостыню, но паче зельне ненавидит таковаго человека и гнев лютыи и страшныи готовит в День Судныи, по Святому Благовествованию (Евангелие Неделя 32). Во истину люто и страшно есть лихоимение не точию еже купечества прибыток не праведныи, но аще кто восхощет и милостыню дати и не даст, но и сеи зело страшныи лихоимец и мытарь ( по Писанию) весьма осужден будет.
Глава 69
О сем яко не подобает взирати или слушати службы еретическия
Подобает же и се ведати и всем крепко держати православным християнскую веру благочестивую. И в неи стояти крепко и держати закон святоотеческии твердо и несумненно и егда прилучится некоему от християн слышати службу их или молебствования и крестохождения или водоосвящение или браковенчания и прочих их всех священнодеиствии, тако же и пения их не слушати, но затыкать уши своя по Святому Писанию. Яко же глаголет Катехизис Великий и святыи Иоанн Никеискии: «Аще кая убо душа приимет от еретик крещение или покаяние или молитвы или ино что духовное или телесно брашно или благословение и таковых убо бесове яко своих имут».
И сего ради верным несть общения с неверными, но и мест их отбегати верным идеже молятся зловернии, занеже тамо бесове живут. И егда поют они и тогда заткнув уши бежати дабы глас их не слышати. Сего ради да бегаем и отвращаемся соборищь и тех мест идеже еретицы молятся и с ними да не осквернятся вернии от зловерных. К сим же и ина многая Священная Писания и служеб и весьма разлучают и удаляют, понеже по Божественному Златоусту (О лжеучителях) наричутся еретицы тем же и волцы нарекошася от пророк и от самого Владыки и Божественных Апостол его и не токмо волцы, но и казители нечестивии и противницы и врази и наветницы и хульницы и лицемерии и татие и разбоиницы и лжеучители и лжепророцы и наставницы слепи и прелестницы и лукавии противницы Христовы и блазнители и сынове лукаваго и духоборцы охулившия Дух Благодатный. Им же не отпустятся в сем веце и в будущем им же путь истинныи хулитися имать к сему же и чада лукаваго Диявола.
И паки яко же глаголет Зиновии (Соборник Малыи): «Яко еретицы служат отцу своему Дияволу и во всем Богови противятся». И паки: «А в еретиках дух лживыи сатанин живет со злеишими духи нечистыми и сего ради по истине ничтоже от них приятно, но вся развращенно и скверна. Яко же писано есть (Лимонарь глава 78): «Се же все бысть нам на образ учения да не слушаем пения латинскаго, ни арменскаго ни прочих еретик». Но в вере в неи же есмы суть, к тои церкви идем да не погубим труда добродетельнаго и с нечестивыми да не осуждении будем вечно мучитися во огне негасимом.
Глава 70
О хождении на праздники еретическия
Еще же подобает всяким образом и действом весьма сего бегати и удалятися яко змия лютаго или яко огня палительнаго и жегома. Глаголю же сице еже на праздники еретическия никакоже ходити идеже из храми бывают и сходятся тамо вси осквернении человецы и творят по своему зломыслию вся богомерзская и скверная и не подобная деяния, ядуще и пиюще и скачущее и пляшущее и всякое безчиние и богоненавидимое дело совершающе по своему их зловерию и нечестию. Воистину бо подобно есть рещи по Божественному Писанию (Евангелие на Успение): «Мирския торжества и праздницы телеснаго ради вожделения и хотения людскаго бывают. Паче же рещи истинно яко бесовка торжествия суть и душам ходатают повреждения и совет их есть прелесть. И пища их есть зависть и злоба и лукавствие и прекословие, убийства и смерти».
На то же ныне скверное сонмище собираются мнози от християн. О горе, горе и во истинну геенское огненное горе погибельному, прельщенному роду християнскому приходит. И вечное томление и муки приближаются, понеже Христос поругаем сим человеком бывает, и християнская вера хулима, яко приходит в таковое сонмище богопротивное, малыя ради своея некия и худыя потребы. Ов того ради, а ин иного ради и глаголют яко нужда нам есть тамо бытии. И тако своих ради сих нужд и погибают и от Бога отлучаются и вечней муце повинни бывают.
А не возможно ли нужду ону отправити во ино время еи всячески возможно, но обычаи свои злои не могут пременити. Горе же о сих глаголют и священная правила (Номоканон лист 36). Аще кто поидет на праздники варварския или еретическия и снесть в тои день жремая от них за душу их или спразднует им лета два да не причастится по 7 правилу иже бо в Агкире святаго собора. «Аще священник есть да извержется от сана» по 70 правилу Святых Апостол. Видиши ли како отрицает дружество и совокупление имети с еретики и с прелестию мира сего. И паки того же собора правило 7-е «Аще кто и свое брашно имыи яст со погаными два лета да припадают».
Зри зде разумно доброразсудный читатель слыши и виждь истинну душеспасительыя пользы. Како разделяет чистаго от ничистых да бы не погибнути купно с ними. Но есть се мучение и геена. Яко же глаголет Божественныи Златоуст (Беседа лист 494) «Всюду явлена есть мука таковым не невернии же в ню впадутся токмо. Чесо ради рцы ми яко верни рече Владыку познаша своего и что сие егда бо житие ничистое есть. Большую сих ради примут муку, нежели невернии». Елицы бо беззаконно согрешиша беззаконно и погибнут. А елицы в Законе согрешиша Законом суд примут и раб ведыи волю господина своего и не сотворив, будет биен много.
И кая сия есть чистота еже на еретическия праздники ходити и скверность их видети и слышати и всякую нечистоту их во памяти имети будут. Но нам подобает со многим вниманием скверных сих пиянственных соборищь еретических бегати и удалятися. И не точию от еретик, но и от своих аще пиянственныи гулятельный обычаи кто имать всячески от таковаго отлучатися. Яко же глаголет Писание (Беседа лист3017): «Аще некии брат именуем будет пияница, Оле колико опасение от таковых подобает отлучатися». Мы же не точию не бегаем пияниц, но и отходим к ним причастницы хотящи бытии сущим их сквернам.
Сего яди вся горе и доле быша вся смешшася и развратишася и погибоша. Не будите раби человеком от совокупления с ними, но обаче поне от ныне бежим отсюду сущаго воеда. Мы же сбивающее сию тину. Престаните сицевыя гибели и удержите стремление еже на сицевых пированиях да не како поне ныне возможем умилостивити Бога и получити обетования благая.
Глава 71
О хождении в гости к мирским человеком
Еще же нецыи от християн в гости к мирским ходят и у них гостят и их рук ядят и пиют и сие есть зело противно священным правилом. Яко не подобает отнюд тако творити кроме зельныя и великия нужды. Кольми иже паче в ненешнее не благополучное время понеже веры християнския не имущия с ними всяко мало и велико и всегдашнее пребывание имеем и аще кто к сим начнет како сеи не велию казнь церковную приимет. Яко глаголет Писание: «С еретики не достоит дружбы имети» и паки: (Зинарь Правило 121) Всякаго ядушаго и пиющаго и дружбы деющаго и любви и единение и таковаго – анафема. Анафем же толкуется по Писанию святаго Иоанна митрополита никейскаго – трижды проклят и се зри зде разумно. Святое Писание что сказует? Яко и дружбы с таковыми имети не подобает. И се како не дружба есть и соединение еже в гости ходити ко внешним и из их рук ясти и пити. И како се не любовь еже с ними частое и многовременное гостение имети. Яко же и паки Писание глаголет (Зинарь правило 76): «И да оставим того и да приходит к Церкви чисте и покаянием да решится своего согрешения».
Поистине глаголет Божественныи Златоуст (О лжеучителях): «Иже врагом церевым друг есть, сеи не может друг церкви быти. И жити недостоин есть, но со враги погибнет и горшая подимет. Тем же незабываи сих прещении». И паки: «Аще то хощет друг быти миру сей враг Божии бывает». Но и паки Божественныи Златоуст глаголет (Маргарит Слово 3): «Аще и безплотных житие сам поживет еретиком же приобщается в дружбе и в любви, таковыи чюждь есть Владыки Христа». Подобно и Исаак Сирин глаголет: «Слово Господне истинно, еже рече: Яко не может кто с любовию мира стяжати любовь Божию. Ниже со общением его мощно общение имети к Богу. Ниже с попечением его – имети попечение Божие. И аще хощеши унынию своему утешение некое имети иди и приближися праведным». И паки глаголет (Слово27): «И тем Богови приближися имущим смирение и навыкнеши правды их, аще видение реченных полезно, кольми паче учение уст их». Слыши зде преподобнаго Исаака глаголюща и поучающа и разделение творити повелевающа. Не точию с еретики, но и с единоверными мирских пристрастии держащихся. Кольми же паче соблюдати себе опасно подобает от еретическаго общения и дружбы и соединения. И не зрети яко же глаголет Божественный Златоуст: «Ни един же Христова ищет, но вси язе своих, сынове их на студодеяния текут, отцы их на лихоимания и хищение, жены их на мечты житейския. Не точию не отметающе, но и поощрающе паче. Стани убо возлюбленниче, яко на камени тверде, на Святоотеческом Предании и укрепися Правою верою и не исходи Никамо же».
Глава 72
О хождении к мирским на поседки
На поседки к мирским человеком ходити или на улицах такоже см мирскими стояти и с ними многия праздныя беседы творити зело пагубно есть душам християнским и благочестивей вере повредно и укорительно и поносно всем христовым рабом по Святому Писанию зело противно. Воистинну бо прилично есть рещи святаго Давыда речение пророческое: «Блажен муж иже не иде на совет нечестивых и на пути грешных не ста и на седалище губитель не седе».
Понеже в совокуплении сих нечестивых яко же о сих паки Писание глаголет (Исаак Сирин): «Пребывая и в суесловиях и глумлениях душею и телом блудник есть и соблаговоляи ему и супраздняяся прелюбодей есть, и сообщаяся ему идолослужитель есть». И тако убо подобает сего ради наказания блюсти себе опасно от таковых скверных и нечистых совокуплений. Еще же и се ведати достоит всякому хотящему спастися, аще убо сия рекл есть святыи и написа верным зело страшно и ужасно. Но обаче тогда верни с неверными сходящееся стояху и глумствоваху сице убо и сии коль страшно на ся осуждение прияша кольми же паче ныне верныя к неверным. Приходят и к еретиком совокупляются и с ними праздныя и безчинныя и глумныя беседы творят.
Кольми паче осуждение примут ищу бо себе от праздныя и скверныя и нечистыя и диявольския беседы утешения прияти себе же вечную погибель приобретают. Нам же подобает всячески от суетных и не подобных бесед удалятися. Лучше бо глаголет святыи сон в безмолвии нежели в бдении, в словесах неподобных. И елико бо удаляется кто от беседования человек, толико сподобляется с Богом дерзновение во уме своем. И поелику отсецает от себе утешение мира сего, потолику сподобляется радости Божия, о Дусе Святем.
К сему же и ина многая Святая Писания. Страшно и грозно Кирилл Иерусалимский запрещает творити таковая. Понеже и еще к сим подобно сказует и Фотий патриарх цареградский сице глаголет: «Срамоглаголания же всякаго и слух и язык да чистоствует, яже кто слушая услаждается, сия глаголати не срамляяся и яже кто глаголаи не срамляется сей велико приимет дерзновение яко и действовати не постыдится. Сего ради подобает нам внимати писанным, а срамоглаголания и праздных и не подобных бесед весма подобает удалятися. И друг другу полезным поучатися достоит. Якоже глаголет Писание (Беседа Лист 1109, 1746).
Сице и мы друг друга наказуем и ниже обличении да гневаемся и паки ни едино же да будет слово праздно. От празднаго бо словеси и в безместныя бо страсти ниспадаем несть бо радости и красования в настоящее время, но плача и скорби и паки (Лист 1751) никто же вас да льстит тщетными словесы на пагубу, а паче от еретических бесед и словес и дружбы и дарования удалятися. Яко же глаголет преподобный Никон Черногорский: «Опасно себе да внимаем да некако нечестива некоего человека оправдим словом или делом, дара ради сходяща. Его ради воли сложению горе рече глаголющем: «Злое доброе и полагающим тьму да будем паче послушницы и повинницы Закону Божию».
Глава 73
О сем яко не подобает с еретики в баню ходити
В баню с мирскими не ходити, ни парится с ними из их сосудов не мытися. Весьма бо о сем запрещают священная и божественная правила богоносных отцов (Кормчая правило святых апостол лист 37 и 39) согласно свидетельствуют и разделяют верныя от неверных, даже бы ни в чем ни совокупитися. А бани ныне тако скверны аще кто разсудит совершенным и духовным разумом. Яко и рещи не возможно понеже несть кому их от скверны еретическия и от блудныя пакости очистити, добро бо воистинну добро и полезно душам нашим.
Еже бо воистинну и совершенно от правды еже бы никогда не ходити в баню аще бы и християнскую и в чистою кольми же паче в нечистую и зело оскверненную и не очищенную никогда же. Ибо о христианских банех воспоминает преподобный Ефрем Сирин и уподобляет сих равно гуслем и тимпаном (Палея книга) егда же и Ангела Божия тогда человек в бани мыяся не имеет при себе близ стояща. Воистинну бо по Писанию всякий покой плотский мерзок есть Богу и душам зело губителен. Подобнее и Зинарь во главе 95 глаголет «Яко иноку не подобает в баню ходити отнюд». Мы же аще и не иноцы, но единаче от мирских разделении, яко и жен не имеем и чад не раждаем, но точию нужды ради не бываем иноцы, ниже мирстии человецы. Но едино имеем точию християнское именование. Аще быша были благочестивии монастыри, то были бы многия иноцы.
Но точию сия печаль обдержит нас, что не имеем монастырей и скитов и сего ради аще и в мире пребываем, Бога боятися и Закон Божии соблюдати должни есмы и хранити себе отвсюду всяким нравом достоит и блюстися от скверны еретическия и от всякия прелести мирския душегубительныя. Аще же прилучится кому нужды ради привеликия и в бани измытися, аще и в християнстей, но и то просто Писание полагати не повелевает. Ибо о сем харатейный устав свидетельствует: «По изшествии из бани подобает от священника молитву очистительную взятии. Аще ли же несть священника то подобает самому себе очистити молитвою. По начале проговорити псалом 50 и поклонов 50 положити и 100 до пояса». Тако бо нас научает Писание очищати себе от скверны. Еще же и сосудов их нечистых банных подобает весьма соблюдатися и ни мало касатися ни к чесому их скверному. Аще кто хощет спастися и благочестивую веру чисто соблюсти сих всех скверн еретических подобает весма удалятися.
Глава 74
О сем яко не подобает веровати в звери в птицы, в гады, в сон во встречу и во ино что богопротивно
Суть убо неции во християнех (Зинарь 68) и же еретическая дела держащии, иже веруют во своя злая злообучения и егда будет по захождению солнца не дают от дому своего ни огня ни сосуд каков или требование некое (Кормчая лист 171, 196, от листа 50). Внимают же курятам и вранам и иным птицам и гадам и во встречу и чох и в часы и водни и глаголюща. Овы добры, овы злы, тако же и в солнеце, и в луну, и в звезды, и скотом звания и ина зла неподобное мнение. И сего ради святоотеческое повеление весма в нынешнее время всем в православии пребывающим сего злаго еретическаго мудрования ни что же содержати. Но вся сия отвергати и не навидите и сие не в грех почитати, но в ересь полагати. Сия бо вся велие душе погибель, и спасению всеконечное погубление.
Мнози бо ныне от християн волшебствуют, егда некии урок наидет на скот их, тогда камение банное влагают в воду и тою водою кропят. Неции же во осметках лапотных углие влагают и ладонь на углие полагают и свещу восковую носят около и кадят. И ина многая безчисленная еретическая злая содевают. Во священных же и божественных правилех весма великое и страшное запрещение на сих полагает зане суд страшен примут о сих.
Сице убо и Матфеи канонист иерусалимский (Глава 40) весьма зело воспрещает и от церкве таковых отлучает, такоже и Номоканон зельне сих осуждает и проклинает во главе 18 сице: «Подобает и игралищ всяких еретических, сиречь: медведи игралищныя или псов много держат не привязуемых, понеже велии вред душевныи от них происходит и проклятие от всех мимоходящих дому тому бывает и Христа от дому своего отгоняет сиречь: нищих, псов ради непреходят убозии, и ино многая всякая прелестная и скверная игралища или ино всякая прелестная и скверная игралища или ино волшебство возвещают изгибшее или чарование за ину и некую немощь и за бурую чаруют или ино что от сих сицевых притецающе, шестолетием да запретятся сиречь: шесть лет да не причастится, а освященныя да извержутся сего ради просим и молим всех православных християн да вси пребудут во святоотеческом законе».
Глава 75
О творящих ворожбы и чарования
Тако же и ворожбы всякия християном весма подобает стрещися и опасение велико имети. И аще кто сему бесовскому делу касается и иных на сие зло попущают. И за сие церковную казнь приимут, яко же о сем глаголет Писание (Номоканон правило 15): «Елицы приводят в дом свои и чаруют им идеже болен есть волхвуют с еретики или ино что, лет пять да не причастится, по 24 правилу иже во Анкире и по 69 правилу иже в Труле».
Сицевыи шестолетним запрешается иже волховати, священныя правила низлагает. Сице и Зинарь о сем весьма запрещает, еже что волховати или к волхвом ходити по 170 правилу и паки Номоканон правило 16 и бобом или ячменем волхвуют, 6 лет да не причастится по 1 главе 40-го стиха иже в Матфее. Тако же иже в пенязи или свещи на воду пущают. Тому же наказанию подлежат тако же и елицы носят хранительная от отрав или что от сицевых или обазания на дети своя и на животная возлагати, урока ради. 6 лет да не причастится по 74 правилу иже в Труле полатнем.
Волхвы убо суть иже некия благотворныя бесы призывают аще и во благия вещи составление скверно убиицы суть вси и лестьцы произволением. Сего ради подобает всем в православии пребывающим блюстися весма и хранитися от всяких сих скверн волхования и ворожбы и погибели сеи. Поучатися пишет убо Божественный Златоуст: «О чадца, человек убо дело Божие и дело диявольское и аще се будет кто творит тои погибнет и на вечное мучение осужден будет».
Надсловие оглавлению еже о наставлении и наказании святоотечестем.
Глава 76
Яко подобает всем усердием и теплым желанием сия вся делом, а не словом творити
Добро убо есть и праведно и воистинну богоугодно и спасительно святоотеческое предание крепко соблюдати с великим опасением хранити усердно. Высокоумие же некое или мнение или осуждением от своего разума весма отлагати и не покарятися своему разсуждению и не внимати, но покарятися своему разсуждению и не внимати, но покарятися дрвлесвятоотеческому взаконению. Поминати же не престанно апостольское наказание, сице глаголющее: «Помните наставники ваша иже глаголаша вам Слово Божие Слово же Божие зде не туне положено, но подобает соблюдено хранити, и паки Слово Божие не на соблазн не на прелесть поучает, ниже растленному и к похотолюбивому житию влечет, и не к лености или небрежению призывает, но крепости Закона Христова и к разуму святых наставляет и ко исполнению заповедей Божиих вразумляет и к животу нетленному и вечному приводит и Царствию Небесному наследники устрояет.
Но точию подобает ревностию сердечною и благим помыслом забвение отлагати и память Богом преданную непрестанно содержати, понеже забвение благим всякому злу начало и конец. Сего бо ради погибель сия приходит человеческому роду, понеже забываем Бога и смертный час сего ради забываем и закон иныя заповеди дрелецерковнаго законоположения и страшный суд Господень и клятвы святоотеческия, понеже писано есть: «Проклятии вси уклоняющиися от заповедей твоих и паки, творяи дело Божие с небрежением, проклят есть таковыи». И аще бы помнили за великий труд праведным веселая и красная воздаяния и жизнь светлую и безконечную радость Господь дарует.
Тако же грешным и слабым и ленивым и нерадивым, страшная и грозныя и лютыя и безконечныя муки за сим же всем наказании. Молю аз слабый и ленивый и недостоиныи и грешный. И припадаю к ногам всех православных християн – вас елико по силе потщитеся реченная вся вышеписанная вси иже вольное и свободное житие имущии вси вы потщитеся вышереченная исправляти и законная исполняти. А еже в работе и под неволею пребывающии тии же меньшая да исправляют, но точию да никтоже лишен будет, еже исправити реченная. Еже како устав повелевает и без того бытии никакоже невозможно понеже уста Господня глагола на быша. Усты всех святых угодник его, якоже сам Господь глаголет: «Слушая вас мене слушает и отметаяися вас мене отметается».
Сего ради слушати и реченная приимати и носити ярем его святыи и уставленная исправляти. Первое в начале келейное правило отправляти. Понеже и Писание Святое тако научает, сице глаголя (Старчество и Сын Церковный, Номоканон и Зинарь): «Аще кто не исправляет правила своего того мертва вменяет Бог. Такоже и круг церковный сему же подобно отправляти. И аще кто не отправляет круга церковнаго, сиречь: вечерни, павечерни, полунощницы и утрени и часов». И в тои день ясти не подобает, якоже прежде речено от Писания, во главе 4-й и 6-й. А посему же и прочия вся предиявленныя заповеди исполнити и совершити подобает. А паче же блюсти себе опасно от осквернения еретическаго и сопребывания с ними и из их рук ядения и всякия дружбы и любве, и аще кто соблюдает все опасно и сохранит законное предание и всеусердно подвигнется делом совершити тои велик будет пред Богом и Царствие Небесное наследит и райское наслаждение и вечное веселие и красоту.
Друзии же мнози именем християны делом же не много лучше поганых, понеже оставиша вся законоположенная святыми и пост и молитву, смешение возлюби со еретики имети. В молении же мнози вся оставиша, но точию едино начало полагают вечер и утро и тако на дело исходят. А в праздники с погаными на гульбы и на игры исходят и одеждами себе украшают и пиянством с ними себе услаждают. Оле горести сея презельныя и законопреступнления лютаго и глубочайшия пропасти адовы, яко законныя заповеди презирают и беззаконныя прелести совершают. И свою погибельную волю исполняют и не точию себе единых погубляют, но и других с собою многих в туже погибель низводят соблазном и прелестию. Воистинну бо по Писанию, горе тому человеку им же соблазн бывает. Где бы подобает по Писанию свету и просвещению бытии, яко же Господь глаголет тако да просветится свет ваш пред человеки, яко да видят ваша добрая дела и прославят Отца вашего иже на небесех.
А соблазнившим другаго таже Господь глаголет: «Лучше бы ему есть навязати на выю его камень жерновыи и во глубину морскую во врещи». Да не едино кто соблазнится от братии есть же и под неволею мнози живут в работе, тако же у нарицаемых християн, а понуждают таковых на дело, а моление повелевают отлагати, но токмо едино начало повелевают полагати, вечер и утро. И сих работников невольныи грех на владетелех их и всякии недостаток. А законопреступление истязан будет иже над ними начальствуяи и принуждаяи сих творити. О горе нам, воистинну горе, яко же глаголет Писание (священноинок Дорофей): «Вси мнимся спастися, а никогда же творим спасаемых дел. Вси желаем Царствия Небеснаго и радости будущия, а никогда же подвигнемся и радеем. Вси слышим яко покои телесный и покои мира в муку отводит, и еще не престая угождая ей».
Вси веемы яко смертны есмы, а николи же умилимся, но еще и времени своего не брегуще спасителнаго. Братию свою погребающее, яко не братия наша умирающе, и сами яко безсмертны пребывающее. Вси слышим муки безконечныя, а никогда же убоимся. Вси слышим яко последняя времена и антихрист уже настоит, а никогда же ужаснемся. Вси вемы яко пришествие Христово хощет явитися уже, а никогда же вострепещем. Яко не имамы книги писаны. Яко не нас обличающее, яко не мы слышащее и почитающее глумимся. Но точию зрим прилежно и ленивых и нерадивых и указуем на них житие и пребывание. Оваго зрим праздники Господня непочитающе и тои погибельный нрав с любовию приемлем. И инаго зрим среду и пяток и посты не храняща, но ядущих дважды и трижды в тыя дни и сих душевредный обычаи такоже с любовию приемлем. И овых зрим пиющих хмельное питие и равно с еретики сообщающихся, и тое злое навычение и прельение паки со любовию приемлем. И других зрим с детьми с брака еретичествующими и оскверненным всяко, во единой храмине с родительми живущих и всяко с ними общение имущих. И сих погибельных человек нрав и обычаи с любовию приемлем. Инех же видим выше меры и не по времени украшающихся и не по подобию. Яко же подобает православным християном и тои прелесныи богомерзскии образ тако же с любовию приемлем.
К сим же подобно и безвременное ядение между порами ядущих и то безчиние с радостию приемлем и на многа безчисленная безчиния видим во многих в наученных от прелести еретичесия погибели. И то по своему зломышлению не восхуляем и не ругаем, но тому же злонравию научаемся. Но воистинну в правду глаголет преподобный Ефрем о грешницех, взирающих на прельщаемыя человеки и глаголюще сице: «Яко же идеже вси человецы, тамо и аз». Тако же и о вере писатель о сих соблазнившихся и прельстившихся глаголет: «Друг друга предваряюще глубочаише бежат». И пророк Давыд глаголет: «Несть творяи благое, несть до единаго вси уклонишася вкупе непотребни быша».
О помрачение ума нашего поистине вси звании, мало же избранных. Но воспрянем и потщимся хотя мало по малу на лествицу добродетелеи восходити и во святоотеческих догматех пребывати и Закон Божий соблюдати и веру Христову сохраняти и Церковь Святую не оставляти. И к Слову Божию прилежно и скоро прибегати и со многим вниманием слушати и творити слышанное. И наставники и учители со усердием поучение и наказание их слушати и отец духовных почитати и повиноватися во всем благопокорно. И аще тако поживем и во всем себе законно соблюдем и сохраним житие свое опасно и сего ради благаго и благонравнаго и чистаго жития. И веселится в нас Бог Вышнии Царь Славы Исус Христос со Отцем и со Святым Духом, ныне и присно и во веки веком, Аминь.