Богоотметничество же его сие есть кроме превращения церковных догмат:
Егда бывшу тому змию лукавно на патриаршестве, келейнику же бывшу у него взяту тогда, по нужди и не хотящу, святу мужу, Соловецкаго монастыря болничному келарю старцу Кирику, пришедшу ему из Анзерския пустыни. И той враг креста Христова удержа его окаянный у себе жити в патриархии. Во един убо от дней виде старец Кирик патриарши башмаки, бархатныя переда, и позре в них, и виде нашит на стелки крест Господа Ісуса Христа, на другой стелки вышито воплощение Пресвятыя Богородицы. И от страха того старец Кирик ужасеся, и от того часа преста ясти и пити. Враг же Христов Никон, вопрошая его: чесо ради не яси и не пиеши? Он же, претворив себе в болезнь тяжку: не могу, рече, владыко зелне! И начат притужно проситися у него на обещанное место, да там гробу предан будет. И отпусти его скоро от себе и грамоту даде ему. Он же, пришед в монастырь, и поведа о том отцу своему духовному священноиноку Виталию о том страшном деле. А отец его Виталий и иным братиям духовным сказа в духовенстве о всем, како крест и воплощение в башмаках носит. И сей есть, враг Божий и богоотметник явной. И второй свидетель сему делу ученик его Никонов, старец Андреян именем, живши с ним и до патриаршества много лет. И виде тот старец у Никона в сапогах крест Христов и воплощение Пресвятыя Богородицы литы из меди тонцы. И той инок Андреян страх Христов имея в сердцы своем, и ужасеся зело, и возневавиде его, Никона, врага Божия, и начат ему пререковати во всем келейном послушании. О том же обличити его врага не смеяше. И многажды бияше его за пререкование, и разъярився нань и окова, и повеле его заточити в Палеостровской монастырь. Той же инок поведа отцу своему духовному Феодосию и иным многим, и Аввакуму протопопу с товарищи все поряду.
Он же Никон, сосуд лукаваго диавола, мучил священноинока Нафана киевлянина, бывшаго у него уставщиком. И бывши у них распри о святом крещении, како отрицаются християне от сатаны и плюют нань. Никон же, поборая по отце своем сатане, глагола Нафану: не подобает плевати на сатану, — не знаючи де то у нас творят! Нафан же рече: подобает плевати на сатану, по отречении его; тако писано есть о сем во святых книгах. Никон глагола: не подобает! И много у них о сем бысть при. Нафан же ревности исполнися по Христе, рече: аз плюю и на того, кто и за сатану стоит! Никон же повеле бити его плетьми и в сылку сосла его на Кий остров. Он же сказа о сем подробну при мнозех.
Он же, Никон, юродивых святых бешеными называл; и на иконе их лика и писати не велел той же Никон, о чем той же инок Нафан свидетельствова о сем, а иная нелепо про него и сказати.
Он же хулил святых отец наших. Преподобнаго отца Іосифа Волоколамскаго чюдотворца Никон, враг Божий, злословил и зело поносил, и ябедником нарицал таковаго богослова, и не поклонялся ему. Преподобнаго же Евфросина лаял за пресвятую аллилуию, указавшу старцу Григорию Неронову. Егда же начал четверить, он же враг Божии, Никон, в то время про святаго Ефвросина о той аллилуии глалола: тот-де дурак безумной был! О сем старец Григорий Неронов сказа и царю вестно то дело было, в соборной церкви при властях. Да покрывает его царь, врага Божия, во всякой неправде, и в том ему судит Бог! И многих святых оболгал и ис поминовения в литии истребил. И все наругаяся творил и порочил. Сам же делне опорочен бысть и поруган от своих ласкателей и ученик. И яко пса изгнаша его земных ради, а не духовных, за землю и за вотчины, а не за Христа и за церковь Его.
И вси они своих си ищут, а не яже Христа Ісуса, по апостолу. Похищаяй бо той волк, Никон, яко разбойник грабя себе у святых монастырей села и вотчины, и у князей такожде отъемля всяко и к своим прилагая. И многия князи ослезил, и монастыри оскорбил и разорил, и простых крестьян тяжкими труды умучил, созидаючи свой горкой Іеросалим. Добре рекл патриарх Іеросалимский о Никоне сице: когда-де руский патриарх начал строити новой Іеросалим, то скоро и бог новой будет на земли, сиречь антихрист! О сем сказа нам грек, именем Павел, и царю о сем вестно было.
Но аще и пес изгнан бысть, но блевотина его и до днесь сладце полизоваема пребывает от любящих ту и не ведящих. А иже узаконоположил Никон нечестивыя догматы превращенныя, а прелщеннии от него паче утвердиша и держатся. Аще и разбойник не прав, но дело его право стало. Господь свесть помышления человеческая, яко суть суетна. Аще Никон наставник ваш правый путь вам показал и обрете веру, почто его изгнасте? когда ученицы на учителя ратуют? Аще Никон враг Богу, и Богородицы, и святым Его, и вам, то почто его прелестныя законы держите, и доколе храмлете на обе колена ваша? Аще есть Бог наш прав со святыми Его своими прежними пастыри нашими, идите за Ним и за святыми Его, святившими вас и отец ваших прежних. Аще же новый Ваал, Никон богоотметник, прав с новыми своими книгами, а старыми ересьми в новых догматех, то идите за ним, поклонитеся иконе его, написанной от его, и самого его не бесчестите. О, слепоты! О, лукавства! Где правда пастырская, и кто их буести и нечестия не посмеется! И царь его не узна пронырства вражия, вся его законоположения любовне держит, а отеческаго своего благочестия ненавидит и держащих благочестие гонит, и томит всякими озлобленьми и мучит. Прельщен бо зело от проклятаго отступника Никона, и от ученик его паче. Слыши небо и внуши земле глаголы раб Христовых! Вам засвидетельствуем всяку правду и всяку истинну, понеже праведнаго судию на земли не обретохом в человецех ныне, в последния дни века сего. Аминь.