Господи Исусе Христе, Сыне Божий, помилуй нас. Аминь
(Евстрат Феодосьевич Урусов сын Феодосия Васильевича Урусова, государственный крестьянин. После смерти отца, утвердил христианскую веру в Польше, был один из составителей Польского Устава (1751 г.). Умер в 1768 году, на 76 году жизни в обители, основанной им в польских пределах).
Иже во Святей Православно Кафоличестей вере, твердо пребывающим, евангельских заповедей усердным хранителем, древле-церковнаго содержания опасным блюстителем, всем благочестивым християном всякаго чина и возраста. Аз последнейший всех грешный Евстратий Феодосиев, ради нынешних смущений, веру свою и исповедание, вам сим писанием объявляя сице:
Верую всею душею моею и всем умом моим в Пресвятую, Всесотворшую, Непостижимую, Нераздельную, Единопрестольную Троицу: Во Отца и Сына и Святаго Духа, Единаго Бога, Едино Существо, Едино Естество, Един Образ, Едина Воля, Едино Царство, Едину Силу, в Трех Ипостасех, в Трех Составех, в Трех Лицех, в Трех Собствех.
Свойствы различие имуща, Божеством и Господьством совокупляемо безначально и безконечно, и превечно. Верую во Сына, прежде век от Отца рожденна, а не сотворенна, единосущна Отцу и Святому Духу, сшедшего с небес и плоть приимша одушевленну от Святыя Девы Марии, рождшася безсеменно от нея во двою естеству, во двою волю и действу совершенна Бога, и совершенна человека, во едином составе и лице. На земли поживша со человеки, нашего ради спасения, распятие плотию претерпевша и в третий день воскресша из мертвых, и вознесшася на небеса, и седяща одесную Отца, и паки грядущаго со славою судити живых и мертвых, и воздати комуждо по делом его.
Потом, иже святии пророцы, священнии апостоли, богоснии отцы, учители и богословы, о вере в Пресвятую Троицу, и о воплощении Божия Сына, написаша догматы, предания, на седмию Вселенскими, и девятию поместными соборы, и киих по единому особно правила, уставы, чиноположения вся, яже писании предаша, а Церковь Божия пряла есть – сия вся с верою и любовию приемлю и свято исповедаю быти.
Бывшая же от Вознесения Господня, в разныя времена еретики и хуления их злая на Пресвятую Троицу и на плотское Сына Божия смотрение, и на святую веру, и на Соборную Церковь, и на все ея святосодержание, вся сия отметаю. Их же Святии Отцы отвергоша и аз отвергаю, их же они проклятию предаша и аз проклинаю, со всем их злым мудрованием.
Паки святии богоноснии отцы, в своих писаниях богословят Пресвятую Троицу в Трех Лицах, Един Образ, и в предисловии Никона Черногорца книги и преподобнаго Иосифа Волоколамскаго в словесех, лицы, яже и образы нарица и собства, сия вся за едино приемлю. Святейших пяти патриархов: Иова, Ермогена, Филарета, Иосафа, Иосифа и вся освященныя их соборы Всероссийския, за едино приемлю, и все церковное их содержание, действо и строение верую и исповедаю свято и совершенно быти. Книги, печатаныя по благословению их, за едино приемлю и почитаю с любовию вся.
В Троичном, шестаго гласа каноне, в 1-й песни и в 3-ей, в трех стихах, лицы и образы, в которых книгах за едино печатано, тако за едино приемлю, и прочитаю непременне и никому пременяти не повелеваю отнюд.
Никон патриарх Московский, и прочие по нем архиереи и мирстия власти Россистия в 7163-го (1665) лета, яже введоша ереси, новины, приложения, отъятия и пременения в Российскую Церковь и в человеческое житие, вся тайнодействия, чины и службы, и книги, вся сия всею душею не приемлю, ненавижу и отметаю, и кая от святых проклятию предана и аз проклинаю.
Иже от Никона патриарха и прочих архиерей и мирских властей, за святое древле православныя церкве содержание, различными смертьми умученных, преосвященного Павла епископа Коломенскаго, священно-протопопов: Аввакума, Даниила, Логина, священно иереов: Лазаря, Полиекта, и Михаила, священно-инока Варлаама, и Соловецкия киновии, священно-архимандрита Никонора и иже с ним священно-иноков и иноков и бельцов, и во всей России во градех и в весех, всяких чинов освященных обоего пола, с ними же и блаженныя памяти родителя моего, Дионисия, с Симеоном и Ильею отцами, всех православных, хвалю и ублажаю великое и усердное терпение их. Верую и исповедаю страдание их честно, богоугодно и свято быти, и всем сердцем желаю, аще и грешник есмь. О! дабы сподобил мя Всеблагий Бог, своею милостию, участия, коего с ними в будущем веце.
Вси сии за древле церковное, Святыя веры содержание, свято, блаженно страдание души своя, в Божии руце преложшии, яже от Святых Писаний богоносных отец, во обличение антихристовы и еретическия прелести, на утверждение правоверным и в научение прельщенным писаша, исповедую свята быти, в том их святом учении, за которое они усердно пострадаша, пребываю, и до кончины своея, несуменно, всею душею и всем сердцем своим пребывати желаю.
На вся же сия вышепоказанная предложения, яже верую и исповедую, како зде написано, нелживо, но праведно, не лестно, но истинно, свидетель Бог да будет на мою душу. Аще ж что зде с лукавством или лестно написано, да будет клятва на главе моей.
При сем моем исповедании, всех вас, боголюбивейшие, православние християне молю, аще в чесом каковое своим скудоумием, в делех и словесех сотворих согрешение, Святыя Троицы ради, простите мя грубаго, грешнаго, всех опечалившаго, и будите милостивы, носяще немощи моя, да приимите от всхе Владыки Бога обещанная, благая люящим Его, в бесконечныя веки.
Сие же мое, выше предолженное о вере и о прочих моих содержанииих, вседушное исповедание всем православным християном, во все истинное изъявление да будет ныне и в будущия лета, жизни моея, о Христе Бозе нашем, Ему же слава в нескончаемые веки, аминь.
Писано сие писание собственною рукою Евстратия Феодосиева 7243 (1735)года и прочтено в соборев деревни Ступилишках марта 24 день, и от всех християн, яко грамотных, так и простых похвалено бысть.